DISTINCTIO XXXVII

Periocha

Occidens proprium mulier violenta maritum,

Nullo deinde alii nubere iure potest.

In ordinibus sacris, scilicet subdiaconatu et supra constitutus coniugium nequaquam contrahere potest : et si de facto contrahat, nullum est et dirimitur. In aliis vero ordinibus contrahi permittitur coniugium, nisi religionis habitum sumpserint ordinati, vel continentiae votum emiserint. Interdicitur etiam coniugium uxorum suarum occisoribus qui et poenitentiam agere compelluntur, aut spirituali gladio feriendi sunt nolentes, non curatis etiam legibus saecularibus in hac parte.