DISTINCTIO XXVII

Periocha

Praesentis verbo nubendum temporis, idque

Durat quam coniunx vivit uterque diu.

Cum matrimonium sit viri et mulieris maritalis coniunctio, inter personas legitimas individuam retinens vitae consuetudinem, ideo coniuges sine consensu mutuo non separantur, nec unus sine altero continentiam vovere potest, sed debitum ei reddere tenetur. Fit autem matrimonium per consensum cordium dictarum personarum, per verba de praesenti expressum, etiam si copula carnalis non interveniat. Estque differentia inter sponsalia et matrimonium, cum sponsus etiam invita sponsa monasterium ingredi possit, et contra : non autem coniuge cognita hoc possit, quamvis et sponsi coniuges quandoque dicantur. Quod si sponsalia cum vidua de futuro contrahantur, per hoc bigamia non inducitur : bene aut si de praesenti, ut Magister dicit. Sed in ultimo non tenetur.