DISTINCTIO VII

Periocha

Patri eadem et gnato divina potentia, gigni

Qua potuit soboles, et generare parens.

Ad hoc quod quaeritur, an pater potuerit, aut etiam voluerit generare filium, affirmative respondendum est. Nec ex hoc sequitur patrem aliquid posse, aut velle, quod filius non possit, aut non velit : quia ibi posse, et velle generare, non est aliquid, sed ad aliquid. Hinc quod filius non potest, nec vult generare, non arguit in eo impotentiam, cum eiusdem sit potentiae cum patre, sed pertinet ad proprietate ipsius personae, cuius est posse et velle nasci, quod quidem in eo est eadem potentia, quae in patre est potentia, qua potest et vult generare, sicut et utrisque est eadem sapientia, et natura. In filio ergo non est potentia generandi, si ad proprietatem referatur intelligentia quamvis bene, si ad naturam. Tunc enim idem sunt, posse generare, et posse generari.