DISTINCTIO XXXV

De cognatione spirituali.

Spiritualis cognatio est, quam caeleste sacramentum per ministerium inter aliquos facit, velut inter compatrem et commatrem, et eorum filios et filias : per quod et spiritualis proximitas inter carnales filios et spirituales nascitur : et ideo inter personam per quam compaternitas contracta est, et carnales filios alterius, ut Nicolaus papa ait, coniugium fieri non potest ; inter caeteros autem potest, licet Paschalis inhibere videatur a nuptiis post compaternitatem genitos.

An quis possit duas commatres ducere unam post alteram ?

Potest etiam quis duas commatres habere unam post alteram uxorem, si commaternitas et carnalis copula primae, nunquam simul fuerunt, velut si ductam non cognovit ; vel si dudum cognita et absque reconciliatione repudiata commater facta est alicuius.

Quod dicit Paschalis papa et Triburiense concilium.

Caeterum si simul fuerint illa duo, non poterit utrasque habere uxores, ut Nicolaus ait.