DISTINCTIO VIII

Periocha

In Christo natura Dei ne nata vocetur,

Ni modo personam significare voles.

Concedi non debet natura divina, nata de virgine, nisi in quantum persona nata de eadem dicitur. Nam in quantum natura stat pro essentia, nec de virgine, nec de patre nata dici potest. Quo etiam modo supra dictum est, quod divina natura incarnata, non nisi pro quanto in persona incarnata dicitur. Affirmatur autem Christus bis natus duas habuisse nativitates, divinam scilicet ex patre, et temporalem ex matre, ob distinctas illarum nativitatum proprietates.