DISTINCTIO XXX

De his quae matrimonium impediunt. In quo ordine nequeat fieri coniugium.

Nunc causas quae matrimonium impediunt repetentes, eas prolixius exsequamur. Non omnis itaque ecclesiasticus ordo matrimonium impedit, sed tantum sacerdotium, diaconatus et subdiaconatus ; in aliis vero admittitur, nisi religionis habitum sumpserint, vel continentiae votum fecerint.

Unde Innocentius : Ut lex continentiae et Deo placens munditia, in ecclesiasticis ordinibus dilatetur, statuimus quatenus episcopi, presbyteri, diaconi et subdiaconi, professi, qui sacrum transgredientes propositum, uxorem sibi copulare praesumpserint, separentur.

Item Ancharitana (alias Anchonitana) synodus dicit : Quicunque diaconi de continentia interrogati iuraverint et susceperint manus impositionem, professi continentiam, si postea ad nuptias convenerint, a ministerio cessare debent.